政壇：政商定格：龔中心訪鮮魚行教食蛋
喺新學期開始，學生哥當然想學習成績理想，唔好食「蛋」啦！但已故華懋集團主席龔如心兩位妹妹龔因心同龔中心，尋日出席鮮魚行學校開學禮時，向來幽默嘅龔中心，叫各位同學記得要多食蛋，不過此蛋不同彼「蛋」，身為醫生嘅佢，仲同校長建議喺學生餐單多加雞蛋，因為雞蛋營養價值高，食多啲聰明啲。
龔因心同龔中心兩姊妹，今年代表華懋慈善基金向鮮魚行學校捐款十五萬元。今次已經係第三年捐款贊助學生，龔因心坦言同同學們好似老朋友咁，因為大家已見過好多次面。之後佢哋喺學生陪同下主持插竹儀式，寓意學校收生人數上升，同學學業進步。有兩位咁有心嘅前輩支持自己，有學生以琴音道謝，亦有同學送上水墨畫以表謝意。
鮮魚行學生向中心（右一）、因心（右二）送上水墨畫。