政壇:搞搞政:張震遠露口風 市建局留後路

市區重建局主席張震遠出年四月任期屆滿,佢尋日出席市建局需求主導記者會時,又再被問及去向。佢之前揚言不再留任,但佢尋日放軟口氣,話政府對市建局管理層一向有六年須換人嘅規矩,佢個人傾向遵守,但仲要睇政府同市建局嘅需要。睇嚟佢係為特首梁振英留條後路,事緣增加供應係政府解決房屋問題嘅一個重要策略,或者特首好需要佢留低,令市建局可以發揮更大嘅功能呢!

張震遠係公職王,最新職位係行政會議成員,而佢多年來亦曾任多個重要職位,包括香港商品交易所主席同公務員薪酬趨勢委員會主席等,其中市建局主席嘅任期到出年四月三十日屆滿,連同同樣出年二月任期屆滿嘅行政總裁羅義坤,市建局將有兩大巨頭流失,出現人才荒。唔少人都關心佢嘅去向,咁點都要回應吓o架!但聽佢尋日咁講,去留嘅謎底睇怕要遲啲先會揭開嘞!

第一手消息請下載on.cc東方互動iPhone/iPad/Android/Windows Phone Apps

設計圖片及對白