政壇：工程界配票飯局言之鑿鑿

立法會工程界議席最後花落誰家仍係未知之數，我哋之前寫過專業會議成員何鍾泰同公文袋黎廣德喺提名期結束前「前後腳」出席飯局，有傳會面內容係兩人會喺選戰最後關頭「過票」支持勝算較高者，務求砌低得到較多業界支持嘅「梁粉」盧偉國。雖然何、黎二人否認事件，又話配票協調嘅講法係針對佢哋嘅惡意抹黑。但報料者就言之鑿鑿，話親眼喺灣仔萬麗海景酒店見到佢哋「前後腳」入十八溪食飯，又話當時係夜晚七點，質疑有人敢做唔敢認。

既然報料者講到實牙實齒，話當日同枱食飯嘅有六個人咁多，加上今次有齊時間同地點，我哋就不厭其煩再問多次黎廣德。黎廣德再次重申事件百分百純屬虛構，自己從來冇同過何鍾泰食飯。佢又話唔明點解會有咁嘅傳聞，但有信心業界中人唔會聽信呢啲流言蜚語喎。何鍾泰就直至截稿都未覆電話，工程界候選人仲有陸宏廣。