政壇：陳克勤賣舖套現賺百萬

嚟緊嘅星期日係立法會選舉投票日，最近就興起「揭黑潮」。建仔嘅陳克勤近日都畀人揭發佢「炒賣」店舖，仲話佢賺成三百六十幾萬元喎。其實克勤仔買舖呢單嘢喺佢向立法會申報時早已有傳媒報道過，佢仲話畀我哋聽，間舖最近賣咗，不過要同朋友兩份分，所以佢先分得百幾萬。點都好，起碼都幫補到啲選舉經費啦。

克勤仔兩年前同朋友夾份，喺深水埗元州街以一千三百萬元買咗個食肆地舖，因為朋友擔心經濟唔好，今年三月尾就決定以一千六百六十幾萬賣出，扣扣埋埋賺咗百幾萬。克勤仔話個舖揸咗一年有多，都唔算係「炒」。

自稱唔識投資嘅克勤，間舖嘅買賣都係由朋友決定，所以依家賣咗，都係將啲錢擺喺銀行算喇。

克勤係立法會選舉新界東候選人，同區名單有張超雄、田北俊、葉偉明、陳志全、蔡耀昌、黃成智、范國威、劉慧卿、何民傑、湯家驊、葛珮帆、梁安琪、龐愛蘭、方國珊、陳國強、龐一鳴、梁國雄同邱榮光。