政壇：工聯會誓港島插旗

建制派之間嘅鬥爭永遠都咁微妙，前日建仔鍾樹根踩入工聯會地頭北角，晒冷盡顯獲福建幫支持，但自稱祖籍福建嘅工聯會「阿王」王國興竟然冇福建幫撐腰，照計點都有少少失落。點知阿王信心爆棚，話自己早兩日喺北角拉票時，好多福建街坊都話會支持佢，仲話自己有明智選擇喎。

風車效應失靈

唔通阿王暗地裏做工夫，拉走樹根嘅福建幫票源？但阿王嫌自己未夠票，尋日又踩番入樹根喺柴灣嘅地盤，仲搵埋重量級人馬、工聯會榮譽會長鄭耀棠落區拉票，佢保守估計要四萬票至當選，目前唔可以輕敵。咦！前日樹根明明話三萬票就夠，睇嚟阿王想搶走多啲票，肥水不流別人田喎。

有份拉票嘅棠哥亦話，依家除咗嫻姐一個唔急外，工聯會區區都告急，所以未來幾日會到唔同區幫手拉票，亦唔會理其他建制派。總之工聯會一票都不能少，仲話坊間傳聞嘅「過票論」唔存在喎！

棠哥仲話今次工聯會首次喺港島區打正旗號出選，最怕七萬名工聯會會員慣咗手勢支持建仔，所以今次唔理其他政黨生死，點都要將工聯會支持者收歸旗下，勢要令工聯會喺港島區成功插旗，因為過去港島區一直冇打工仔代表嘅喎。

工聯會原先諗住以「風車效應」，由嫻姐推高其他直選選區嘅支持度，依家聽棠哥咁講，似乎個風車吹唔郁喎！

其實民主派都睇準嫻姐有鐵票，所以所有選舉論壇都冇向嫻姐開火，因為佢哋想嫻姐高票當選，繼而令同樣係建制派嘅建仔李慧琼失票。如果呢個講法係真，睇怕操盤人唔落「柯打」都唔得啦！