護理失當又殺人 黃綠醫官須整肅

太一叮呢幾年不斷提醒大家要保重身體，千祈唔好病，事關有病入醫院隨時誤闖閻王殿。係人都知，公立醫院醫療事故無日無之，開刀、打針、配藥、輸血……每個環節都可能係奪命陷阱，但諗唔到，家陣連插胃管都可以攞人命，你話幾咁得人驚！

今年五月尾，錢伯因患甲型流感被送入博愛醫院，由於吞嚥食物有困難，被安排胃管餵食。錢伯嘅女兒憶述，親眼見到病人服務助理無遵守醫管局指引，棄用酸鹼試紙化驗，直接打氣入胃聽聲，確認胃管位置，於是向護士同病房主管投訴。

錢伯八十幾歲人，治療過程稍有差池都極之牙煙，院方收到投訴之後係咪應該嚴肅處理、積極跟進呀？點知，六月五日晚錢女士目睹病人服務助理犯同一錯誤，輸入奶汁後五分鐘，父親面容扭曲同濁親，疑因胃管誤入肺部所致。最後，錢伯於六月六日凌晨因肺炎死亡。

錢伯患甲型流感，結果因肺炎死喺醫院，可以話係死得不明不白。嗱嗱嗱，講到呢度，太一叮有必要引述護理專家嘅一段說話：因食道同氣道相近，若稍有不慎誤將胃管插入肺部，可致吸入性肺炎，嚴重會導致病人死亡。

好地地一條人命，就咁樣冇咗，叮！博愛醫院承認病人服務助理違反指引，已暫停所有病人服務助理嘅胃管餵食工作，並將個案轉介死因庭跟進。

餐餐都係害死人之後至嚟補鑊，有咩用呢？博愛醫院居然用無心無肺嘅醫護照顧病人，簡直係草菅人命，咁同閻王殿有乜分別呀？正如錢伯女兒話齋，病人服務助理唔跟指引又得，護士唔報告又得，原來醫管局訂定嘅指引係無用嘅，教人一套，醫人就另一套，視人命如草芥！

叮你個鎯鎯，前食衞局局長周一嶽真係害人不淺，在任時醫療事故層出不窮，害到無數病人雞毛鴨血，早就被太一叮叮到體無完膚。諗唔到呢位黃綠醫官滾蛋嘞，依然有醫療事故醜聞跟身，呢鋪唔叮爆佢鎯鎯都對佢唔住啦，吓話？叮！叮！叮！

唉，公立醫院每爆一次醫療事故，就等如製造一場人間慘劇，病人被割錯器官嘅有，身體慘變醫療物品儲物櫃嘅亦有，有命入院無命出院嘅更加數唔晒，到底呢類殺人如麻嘅醫療事故噩夢幾時至會停止？

拜託新任局長高永文千祈唔好做另一個每周一鑊嘅黃綠醫官，快快整肅醫療亂象，如果唔係，小心閣下個鎯鎯呀，叮！