SUN世代：美容達人創業終身美麗

走過荊棘，人生才會變得更精彩。翁成鳳是大型美容集團太子女，雖早已決意接手家業，但她堅拒走平坦路，反而去打工、創業。在荊途上，她一直默默學習和堅持，更突破傳統，成功將男士美容帶入主流。如今，她擁有自家美容事業，更回巢為家族生意領航，延續家族的美麗傳說。

外表清秀的翁成鳳，是天生的美人胚子。她從小就深明護膚之道，只因身邊有位「美容達人」——在美容界三十年、創立化妝學校的母親胡芬妮。「好多護膚同化妝技巧，都係喺媽咪嗰度學返嚟。」從前那個替客人洗臉都會手震的「小妹妹」，今天已是擁有一對美容巧手，及豐富美容知識的美容店老闆。

「記得第一次幫人洗面好驚，不過啲客人好好，當我係小妹妹唔會鬧。」中五那年，正放暑假的翁成鳳落舖頭做「暑期工」，除了負責賣護膚產品，還要幫客人洗臉、做facial。女人都愛美，翁成鳳更視為人扮靚是終身事業，大學畢業後，她隨即加入家族公司工作。

但是有一天，太子女突然放下身段，寧願不做高層，而做「打工仔」。「淨係幫屋企嘅話，眼界唔夠闊，出去闖一闖，可以學多啲嘢。」她先加入大型連鎖化妝店，由美容顧問做起，再在一間酒店的水療部工作。打工期間，她又不斷進修，兼讀化妝課程，考取多個美容及化妝牌照。這段經歷，不但磨練出她的堅韌，更為她帶來美容新意念。

「打工嘅時候，發現愈嚟愈多男顧客，而身邊嘅男性朋友又成日問我美容知識。但喺香港無咩專為男士而設嘅美容院，我覺得男士美容係一個新興市場，就同個朋友一齊合資開男士美容店。」○八年，她辭去工作，一嘗創業，但尚未起航，已不幸觸礁，遇上金融風暴。「十月開舖，十一月就發生雷曼事件，啲男士又點會肯拎錢出嚟做美容呢？」

創業大計被打亂，翁成鳳立即改變策略，除了男士，亦兼顧女士美容，只因「扮靚始終係女人必需品」。待經濟漸好，她再主攻男士美容，新店生意終漸上軌道，現時她已擁有兩間自家男士美容店，證明最初的想法沒有錯。「社會改變咗，男士們比以前更加留意自己儀容，所以呢幾年行內競爭都大咗。」

除要面對競爭，創業做老闆還要親自應付「麻煩客」。「有啲熟客鍾意指定美容師，如果唔係同一個人，會要求退款。最初都會唔知點handle，惟有邊做邊學，最緊要係同啲客強調，我哋服務質素行先，令佢哋對我哋嘅員工有信心，所以經驗好緊要﹗」在外闖蕩多年，翁成鳳從失敗經驗中學習，在磨練中變得更強。今年她更與家族經營的美容集團合併，兼顧打理五間美容院，帶領家業走上高峰。視美容為終身事業的她期望跟母親一樣，可做到敬業樂業。「媽咪係我學習榜樣，佢做嘢好積極，唔係為名利，係真心希望幫人哋變靚。」

翁成鳳小檔案

現職：胡芬妮美容集團市場部經理

學歷：澳門大學市場學系學士

公職：半島青年商會2012聯誼事務主委

興趣：旅遊、健身