政壇：政商定格：無家者義工人牆護林鄭
無家者世界盃香港籌委會喺尋日嘅慈善賽籌到二十萬元，足夠代表隊八名隊員去墨西哥出席無家者世界盃。身兼扶貧委員會籌備小組副主席嘅政務司司長林鄭月娥致辭時賣口乖，話自己每次都會爭取出席同無家者或露宿者有關嘅活動，又透露近排同咗唔少團體開會聽意見，大大加深佢對本港貧窮問題嘅認識。
內地六個城市非當地居民「一簽多行」赴港個人遊計劃將實施，記者喺活動後問林鄭新計劃會唔會對本港出入境部門造成壓力時，一班無家者世界盃義工即刻上前幫佢開路，仲起勢用手擋開一直追問嘅記者，令備受保護嘅林鄭全程淨係講咗「唔好意思，借借！」同埋「講咗啦！」幾個字。
面對記者進逼，多名義工出手護駕，令林鄭成功突圍離開會場。