政壇：搞搞政：鄉事建制角力發叔變夾心人

喺每次選舉，新界鄉議局主席劉皇發嘅取態都舉足輕重，唔少鄉事委員會主席、甚至村代表都習慣睇佢頭，至決定支持邊個候選人，結果發叔就成為各方拉攏對象。今次立法會選舉，發叔面對嘅困難比以往更加複雜，由於佢堅決支持原居民自己派隊，結果受盡壓力，未到投票日已經兩面不是人。

以新界東為例，經濟動力邱榮光名單如果唔係得發叔喺背後發功推動，根本就唔可能成軍。係人都知，鄉事派出選，完全唔係建制派操盤人嘅計劃，結果發叔同班鄉紳受盡壓力，時不時就畀人召去照肺，就好似前日邱榮光搞造勢大會咁，據聞發叔原本係會出席，但奈何有勢力人士執意阻撓，用各種藉口纏住發叔，令佢甩唔到身。

佢喺新界西原本有心儀嘅人選，但據聞已進身行政會議嘅鄉議局副主席張學明，早前拉埋兩名建仔候選人同發叔食咗餐飯，建仔開到口尋求支持，發叔好難推，喺半推半就下就支持咗建仔。