政壇:田二少街頭生日騷拉票

選情激烈,立法會新界西候選人之一嘅新民黨副主席田北辰大打溫情牌突圍。尋日係佢六十二歲牛一,十幾個愉景新城嘅街坊約好時間,齊齊為企緊街派傳單嘅田二少大唱生日歌同切蛋糕,吸引唔少途人目光。嚟撐場嘅仲有佢大女植恩同男友Bobby,而細女植鏘身在外國,亦派咗男友Johnathan做代表同爸爸賀壽。

唔知係咪開心得滯,田二少連生日願望都唔記得許,就手起刀落切咗個蛋糕,不過唔使佢講,大家都知佢嘅願望係乜嘢啦!

本來田二少想喺個生日蛋糕上面插夠八支蠟燭,嚟配合佢係八號候選人,點知蛋糕店畀唔夠八支蠟燭,惟有只點一支。有兩個準女婿慶生兼助選,田二少梗係開心,但佢笑言恨抱孫恨到流晒口水,希望兩個準女婿識做喎!新界西候選名單仲有梁志祥、麥美娟、陳樹英、陳偉業、麥業成、曾健成、陳恒鑌、譚耀宗、郭家麒、梁耀忠、李永達、陳強、李卓人、何君堯同陳一華。

第一手消息請下載on.cc東方互動iPhone/iPad/Android/Windows Phone Apps

田二少(右三)壽辰,大女植恩(前左一)同男友Bobby(右一)、細女男友Johnathan(右二)同佢喺街頭開生日會。