政壇：鐵頭仁誠信崩潰

白鴿黨嘅醜聞一單接一單，繼主席鐵頭仁連番被揭漏報資產之後，佢啲黨友又連番爆出搞平價茶敍同派包，喺近日嘅選舉論壇中屢被圍攻。

唔同機構陸續舉辦選舉論壇，而論壇嘅辯論環節除咗係候選人發表政綱嘅機會外，亦係乘機攻擊對手嘅時候。尋日再有一個電台喺東涌舉辦超級區議會選舉論壇，主辦單位喺論壇上增設咗個送贈競選口號環節，鐵頭仁嘅團隊梗係趁機話吓建制派啦，佢哋揀咗送建仔劉江華嘅口號畀工聯會陳婉嫻，話「多選正經人，多做正經事，香港要贏，民建聯就要輸」，希望嫻姐可以同佢哋攜手踢走建仔。

被寸熟悉中聯辦環境

但劉江華都唔示弱，用番鐵頭仁嘅競選口號「無畏強權，向不義挑戰，幾許風雨爭民主」，又質疑佢點解再冇提到白鴿黨常用「堅定可信」四字，係咪覺得自己唔再可信。劉江華又批評鐵頭仁口口聲聲話反對功能界別，但又提議設立超級區議會議席呢個功能界別，自己仲參加埋，立場極不堅定；加上不斷漏報資產，「漏報一間公司就係疏忽，漏報兩間就唔記得，三間就誠信有問題，四間就係唔可信」。

劉江華仲話，當三隻正義白鴿去廉政公署控告另一泛民候選人作失實聲明時，鐵頭仁反而去打壓佢哋，一啲都唔公道，完全冇公義可言。而喺尋晚播出嘅另一電視台論壇中，鐵頭仁喺質問劉江華認唔認同要拆除中聯辦外嘅花槽時，反被質疑佢曾經鬼鬼祟祟咁入過去中聯辦談判，應該好熟悉嗰度嘅環境喎！

超級區議會議席候選嘅名單仲有李慧琼、涂謹申、陳婉嫻、馮檢基及白韻琹。