擴大深圳個人遊 慎防好心做壞事

古語話，有朋自遠方來，不亦樂乎。但如果南下造訪嘅北方之友，人數四百萬，浩浩蕩蕩，咁又點睇呢？

嗱，由下個月起，內地個人遊政策進一步放寬，四百萬名非深圳戶籍居民可以一簽多行形式來港，個人遊大軍又添一支勁旅。顧名思義，一簽多行即係辦一次簽證，一年內可以無限次往返香港，即係話實際新增嘅潛在客源可能係四百萬乘N次方，呢鋪羅湖口岸嘅迎賓大門隨時被逼爆都似。

一簽多行，遊客如雲，大家必須做好開門迎客嘅事前準備。準備啲乜？咁就睇你係乜嘢身份嘞。如果你係港府高層，就要做好過關準備，包括增加口岸人手，疏導激增人流，千祈唔好拆毀香港旅遊業塊招牌。如果你係名牌連鎖店老闆，就梗係準備迎接財神爺啦，內地客源擴大自必然刺激本地消費，商戶又係磨拳擦掌嘅時候，唔好再做出只許內地大款購物、不許香港市民拍照嘅丟架動作就得嘞！

好嘞，萬一閣下既唔係高官，亦唔係老闆階層，只係一個尋常老百姓，又要準備啲乜呢？做好心理準備囉，事關以後你將會捲入一場無硝煙嘅中港大戰之中。

嗱嗱嗱，唔係嚇你o架，內地同胞同香港市民爭產房床位、爭購奶粉、爭日用品、爭醫院病床、爭交通工具座位，早已變成一場火花四濺嘅攻防大戰。內地豪客來港搶購住宅，就更加有份導致今日樓價風高浪急添啦。家陣再擴大個人遊，等如以無限人口爭奪有限資源，香港一下子承唔承受得起o架？

仲有呀，開放非深圳籍居民來港，香港公共資源承受能力面對考驗，香港人嘅心理承受能力一樣受到挑戰。太一叮唔係鼓勵歧視，過去一年內地同胞同香港市民摩擦日增，下月起深圳居民南下湧港，萬一又爆發我鬧你蝗蟲，你鬧我係狗嘅爭拗，搞到中港矛盾再次升溫，好傷感情啫！

所以，雖然話有朋自遠方來，不亦樂乎，但係面對突然增加嘅四百萬名新訪客，香港人唔係人人笑得出o架。咁講啦，水能載舟，亦能覆舟，個人遊無錯係一條北水南調嘅大水喉，但係中央同特區政府一定要審時度勢，思慮周全囉。

擴大深圳個人遊，慎防好心做壞事，兩地政府最好都係三思而後行，唔好搞到香港反艇呀，叮！