政壇：搞搞政：人力秒殺短片上網吸票

要吸納年輕選民嘅支持，互聯網已成為候選人不可或缺嘅宣傳工具，一眾政治組織中，以被稱為激進泛民主派嘅「人民力量」將互聯網優勢發揮得最好，佢哋嘅立法會議員黃毓民喺某場九龍西選舉論壇「秒殺」對手嘅短片，短時間已突破四十萬次點擊率，透過網絡分享令睇過嘅人不計其數，仲有效益過真金白銀賣廣告。

據聞，佢哋嘅候選人細心創作啲足堪玩味嘅金句迎戰選舉論壇，無論係寸對手又好、鬧對手又好，最緊要係做到鼓動人心、煽動情緒，只要其中一區論壇有「金句」爆出，班支持者自然會將論壇嘅精華片段放上網，一區發圍、五區受惠，成效仲好過派人參選超級區議會。

互聯網宣傳效用有幾勁？睇吓毓民喺論壇後嘅最新民意調查顯示，毓民支持度有成百分之二十，仲未反映日前佢哋最新放上網嘅一段論壇精華片段，睇嚟下次民調結果真係唔講得笑。九龍西候選名單仲有梁美芬、蔣麗芸、黃碧雲、毛孟靜、譚國僑、林依麗、黃以謙同黃逸旭。