政壇：英姐新工（目及）實強積金

唔再競逐立法會勞工界議席嘅李鳳英，最近又有新搞作。政府尋日宣布，委任英姐做強制性公積金行業計劃委員會主席，對做咗多年立法會議員嘅佢嚟講，簡直就係駕輕就熟；最值得一提嘅，英姐今次係代替建仔嘅立會進出口界議員「象哥」黃定光出任呢個職位。勞方取代資方，睇住個檔攤嘅用意相當明顯，當然係（目及）實班僱主喇！

到底強積金行業計劃係乜東東？咁同普通強積金計劃有乜分別呢？查實呢個計劃，基本上就係為飲食業同建造業呢類習慣以日薪形式支付薪酬嘅行業度身訂造。眾所周知，呢兩種行業不時都會出現勞資糾紛，搞得唔好隨時引發大規模工潮，成為政府嘅巨型政治炸彈，大大影響社會和諧。

勞聯鄧家献獲委任

以英姐勤奮唔偷懶嘅往績、多年為勞工爭取權益嘅經驗，同埋多年同資方或者政府討價還價培養到嘅政治技巧，相信佢上任新職後定會密切睇住成個計劃運作，唔會畀佢出問題。話晒佢參與監督強積金運作嘅經驗已相當豐富，佢喺○七年開始已經擔任積金局嘅董事會成員。就連財經事務及庫務局局長陳家強都盛讚，話英姐對強積金事務具豐富經驗同知識，相信佢可以為呢個委員會提出寶貴嘅意見咁話。

除咗英姐獲委任，同屬勞聯嘅鄧家献亦獲委任做成員。至於資方代表方面，敍福樓集團董事總經理黃傑龍同樣首度獲委任做呢項公職，而太興燒味主席陳永安就續獲任行業計劃委員會嘅成員。