齋噏撐體育 吹水唔抹嘴

好消息！倫敦奧運奪金中國健兒將全數嚟港出席「奧運金牌精英大匯演」，齊齊整整，一個不漏，市民有眼福，港府可抽水，皆大歡喜！

民政事務局局長曾德成話喎，希望金牌選手表演可以增加港人對運動嘅興趣，推動本地體育發展。佢仲拍晒心口話港隊下一個目標係向金牌邁進添，簡直係信心爆棚。梗係喇，港隊今次憑女單車手李慧詩發揮超勁爆炸力，勇奪一塊銅牌，唔使好似四年前北京奧運咁食白果，港府梗係想攞彩喇。

曾局長仲賣花讚花香，話政府用喺精英運動員嘅經常性開支過去五年增加咗兩成七，每年投放高達三億元。言下之意，港隊表現進步，政府功不可沒。佢又提到特首梁振英希望設立體育專員，全面檢討體育政策，政府架構重組落實之後就會考慮咁話。

高官對發展體育滿腹宏圖大計，點都好過關人個關，問題係，齋噏唔飽肚，最緊要講得出做得到，千祈咪學前朝政府咁，發展體育得三分鐘熱度，一有本港健兒創佳績、攞獎牌就出嚟抽吓水，左一句全力支持，右一句增加投入，但做完騷之後就冇咗件事。

嗱，「風之后」李麗珊又好，「乒乓孖寶」李靜及高禮澤又好，佢哋載譽歸來時，港府高調迎接，讚譽有加，但從未把握時勢，乘機推動體育發展，結果旋風過後，水盡鵝飛，一切照舊。

以單車運動嚟講吖，「車神」黃金寶獲獎無數，享譽亞洲甚至國際，港產官僚除咗利用阿寶戰績為自己貼金，試問為發展單車運動做過啲乜？講起真係失禮，本港到依家都冇一個符合國際標準嘅室內單車場，搞到運動員要山長水遠北上甚至出國訓練，問你服未！

仲有吖，○九年東亞運港隊勇奪男子足球金牌，曾蔭權話當日係佢全年最開心嘅一日，當局仲委託顧問公司為改革足總搞咗個「鳳凰計劃」，點知認完叻、抽完水就乜都唔理，鳳凰就話浴火重生啫，香港足球家陣仲係水深火熱吖，陰功！

話到尾，香港體育發展停滯不前，全民運動有名無實，港府有不可推卸嘅責任。本港既冇完整嘅體育政策，主管官員對體育一知半解，敷洐塞責，運動健兒孤軍作戰撐得幾耐？再係咁落去，莫講話獎牌由銅變金美夢難圓，運動員遲早意興闌珊，設體育專員又有乜嘢用吖，叮！