政壇：搞搞政：葉劉告急Call陳岳鵬回巢

新民黨主席葉劉淑儀從政之後，用心培養新血，前特首辦特別助理陳岳鵬（Ronald）就係佢嘅愛將之一，不過，兩年前Ronald丟低匯賢智庫身份及辭去南區區議員職務過檔特首辦，搞到新民黨喺有關議席補選一役中輸得一敗塗地，葉太事後曾經撰文暗插Ronald係叛徒，又喺立法會質疑Ronald嘅工作能力，更加下令旗下區議員唔可以借黨做跳板入政府。

不過，尋日喺個直選論壇上就見Ronald陪住葉太出席，仲透露已經重投新民黨大家庭，會喺選舉期間幫葉太打電話畀地區樁腳同落區宣傳。Ronald透露，七月卸任後去咗美國三藩市放假兼去母校史丹福大學探朋友，上星期突然收到葉太選情告急嘅電話，希望佢返港幫手助選，離巢嘅Ronald咪急速歸隊囉。

曾經有裂縫嘅兩師徒走埋一齊，到底Ronald當年係咪激嬲咗葉太呢？佢大大聲話「無啲咁嘅事」，葉太就盛讚Ronald係人才兼叻仔，一副雨過天青嘅款，真係從政者要大量。不過，港島區強手名單咁多，難怪葉太要急召有經驗打選戰嘅Ronald喇。