政壇：龐愛蘭拚選戰拒醫腰痛

立法會選舉戰事激烈，參選人無不瞓身搏殺，今年捲土重來參加新界東直選嘅公民力量龐愛蘭（Scarlett）就日日搏到盡落區同街坊握手拉票，唔知係咪咁，搞到條腰赤赤痛，但佢唔想浪費時間睇病，結果搞到隻腳都痛埋，焗住要去睇醫生。本身係藥劑師嘅Scarlett，睇醫生都要睇個出名嘅，最後搵咗行政會議成員林奮強嘅細佬、骨科專科醫生林自強。

林自強幫Scarlett檢查過後，發現佢尾龍骨出咗問題，壓住神經線導致腳痛，二話不說要佢多啲休息，但為咗勝選，佢堅持落區見選民。Scarlett透露，依家要定時食藥同做伸展運動防止惡化，睇嚟佢要捱多個月先可休息喇。新界東候選名單仲有張超雄、田北俊、葉偉明、陳志全、劉慧卿、黃成智、蔡耀昌、范國威、湯家驊、陳克勤、葛珮帆、梁國雄、邱榮光、何民傑、梁安琪、方國珊、陳國強、龐一鳴。