政壇：鄉事建仔被河蟹

距離新一屆立法會選舉下月九日投票只剩唔夠三個禮拜，啲候選人或政黨已經開始打出選戰催票最靈嘅一招告急牌，好似新界西選區，建制派爭崩頭，尤其係鄉事派同民建聯陷入互相扯票嘅惡鬥，不過，身兼行政會議成員嘅鄉議局副主席張學明就擺明無視地區打得火紅火綠嘅現狀，尋日直言鄉事派同建仔冇惡性競爭，亦冇面和心不和，佢咁樣算唔算擘大眼講大話呢﹖

幫手拉票走過場

張學明尋日落區幫建仔陳恒鑌（Ben）助選，被問及建仔同鄉事派被指不和，佢話呢啲只係傳聞，又話即使冇爭拗，鄉議局同建仔都會分別派隊伍出選喎。建仔同鄉事派關係差早已係冰封三尺嘅事，直接導火線當然就係去年區議會選舉後，建仔霸晒所有地區領導席位。

學明上屆代表建仔出選新界西，得到鄉議局背書，所以鄉事票全部被民建聯吸晒，但今次做過新界社團聯會（新社聯）會長嘅學明退落嚟，交棒畀兩位新社聯嫡系梁志祥同阿Ben，同建仔主席譚耀宗組成三張名單出戰。鄉事派分票下，建仔要取三席已經冇可能，尋日張學明帶阿Ben去荃灣圍村拉票，雖然深入鄉村，但票喺鄉民手，佢都係走過場啫，到底死撐阿Ben選情唔悲觀係一句善言，定係一句見死不救嘅話，好快有結論。

眾所周知，建仔今次喺新界西頂多保住兩席，譚耀宗外，另一席一定係留畀身為新社聯會長嘅梁志祥，學明自己做過新社聯會長，冇理由唔清楚個局勢係點。

面對新界西強手林立，候選名單都有郭家麒、麥美娟、麥業成、田北辰、梁耀忠、李永達、陳樹英、陳強、陳偉業、李卓人、曾健成、何君堯、陳一華，建仔三席夢真係危o架。