霸王餐知多少 警濫權何時了

恃強凌弱本來係市井流氓無賴行為，勢估唔到，堂堂特區警察都係一擔擔，最叻蝦女人，食霸王餐。警察知法犯法，濫權作惡，你話該當何罪吖。

專門協助性工作者嘅組織踢爆，今年上半年接獲涉及警務人員嘅投訴大幅飆升，高達二百零三宗，係舊年下半年數字嘅一點四倍。其中享受免費按摩服務佔最多，其次係無償接受手淫等嫖妓服務以及公然剝削性工作者權利，涉及非禮嘅個案都有唔少。簡單嚟講，即係食霸王餐咁解。

話時話吖，呢啲投訴個案只係冰山一角咋，原因係唔少受害人擔心遭報復，加上唔少性工作者持內地雙程證，既唔識點樣投訴，又擔心被遣返，所以焗住要啞忍，就算蝕底都唔敢報警，講起真係可憐。

講真，好人好姐，邊個願意從事呢個行業吖，唔少性工作者受黑社會操控及嫖客虐待，港產公安唔維護公平正義，反而落井下石，蝦埋一份，咁嘅所為唔單止無良，簡直就係賤格，呢啲敗類根本唔配做警察。

查實，警察濫權對性工作者揩吓油、抽吓水，不過係小兒科咋，更離譜嘅事都仲有吖。呢，本報月前踢爆，落馬洲分區指揮官每日上落班，短短八分鐘車程，居然出動下屬為座駕疏導交通，保駕護航，好似土皇帝出巡咁款，簡直不知所謂！

上行下效，有樣學樣，警察濫權唔分級別，不論場合，投訴數字唔急升至奇喇。嗱，冇花冇假o架，警方投訴警察課數字顯示，舊年因濫權等投訴成立而接受紀律處分嘅人數，比前年激增一倍，問你驚未！

講到濫用警權，最惡劣莫過於肆意打壓新聞自由嘞。警方身為執法者，冇保護傳媒採訪不特止，仲處處設限，而且手段污糟邋遢，無所不用其極。為咗限制傳媒採訪，竟然大玩「熄機」，話就話通訊數碼化，其實係要阻止傳媒及時報道突發事件，一旦爆出處理失當醜聞，唔使即時通晒天，就算濫權有幾誇張，都可以神不知鬼不覺喇。

執法者踐踏核心價值，將傳媒視為眼中釘，卒之搞到香港立立亂，港人冇晒安全感。警權無限大，香港好失敗，新政府係時候撥亂反正喇，叮！