政壇：政商定格：林D9現身拉薩曬佛節
有讀者周日早上見到前政務司司長林瑞麟（林D9）現身機場離境禁區，去邊呢？咪係西藏拉薩囉。原來佢趁住去英國牛津大學進修神學之前，同太太去西藏玩番轉，參加當地一年一度嘅雪頓節盛會。
雪頓節又稱為吃酸奶節，又有拉薩曬佛節之稱，會展示以五彩絲綢織成嘅釋迦牟尼大佛畫像、跳藏戲及過林卡三大內容。前晚喺喜瑪拉雅飯店入面，林D9夫婦就一邊食飯，一邊欣賞充滿民族色彩嘅雪巴拉姆藏戲團表演八大傳統藏戲。據講佢喺晚飯席間聽見有人講廣東話，即時告知太太有香港人在場，但唔見佢同在場嘅香港人打招呼，完騷就走人，咁當然亦無香港人主動上前同佢打招呼啦！
無官一身輕，林瑞麟同太太食飯、飲啤酒睇表演，相當快哉。
林瑞麟（後右二）邊睇表演邊影相。（林登麗攝）