政壇：搞搞政：撐前家廚索償 勞聯畀貪曾翳

工會嘅最大角色就係代勞工揚聲，不過，曾蔭權前家廚于燕平（于師傅）早年因超時補償一事同政府對簿公堂，據聞當時冇乜工會敢接于師傅呢個個案，明眼人都知此舉無非唔想得罪政府，咁于師傅咪求助無門？勢估唔到，最後出手係立場較為親建制嘅勞聯。

貪曾同于師傅當年嘅勞資糾紛全城關注，不過咪以為好多人爭住撐較弱勢嘅于師傅。有知情人士爆料，勞聯當年肯接于師傅嘅個案，事前都冇人睇好會有乜成果，最後于師傅得償所願獲得賠償，都可算係意料之外。不過勞聯今次仗義幫于師傅都唔係無手尾跟，因為貪曾對呢件事一直心中有氣，有人聽聞貪曾早年拜會勞聯時，仲疑似畀說話佢哋聽，唸唸有辭話自己心入面仲有條刺，慌死無人知道佢有幾小器咁。

不過，貪曾同勞聯嘅微妙關係喺七一前有突破性發展，話說貪曾七一卸任特首前嘅授勳名單，有勞聯領導層竟然獲頒授銅紫荊星章，莫非貪曾臨別時突然大徹大悟，想為過去嘅小器行為「補鑊」，甚至修補同勞聯嘅關係？