政壇：學民思潮Hea踩場蕩失路
學民思潮近排經常去建制派立法會候選人地頭踩場，尋日輪到去搵西九新動力梁美芬。不過，佢哋似乎冇做足功課，竟然去咗西九新動力嘅舊總部，成班人企咗喺條街度「條條揈」都唔知點算，徘徊咗一陣終於去咗梁美芬嘅區議員辦事處，但可惜當事人唔喺度，佢哋兜兜轉轉結果都係摸門釘。
點解學民思潮會去錯地方抗議呢？黃之鋒解釋，因為佢唔得閒，所以交畀班朋友仔搞，點知佢哋喺網上搵咗啲舊資料，所以就去錯西九新動力嘅舊總部。
佢哋見唔到梁美芬，惟有將預備嘅黑心拼圖交畀梁嘅助理，希望梁美芬聽到佢哋嘅「心」聲，支持撤回國民教育。至於點解係黑心？因為白色嗰個心整爛咗喎，睇嚟佢哋下次踩場前要做足準備先得喇。
九龍西候選人名單仲有黃碧雲、毛孟靜、蔣麗芸、黃毓民、黃以謙、譚國僑、黃逸旭、林依麗。
學民思潮成員去錯咗地方搵梁美芬，搞到成班人企喺街度唔知點算。