政壇：功能界換班助政府箍票

新一屆立法會快將選出，早前提名期結束後，功能界別議員組成都有大致輪廓，更因為以前議會嘅懶蟲一族如霍震霆、黃宜弘、李國寶等引退，新功能界別議員「少發言、少開會」嘅形象應能扭轉。

除力度提升外，「新血」坐定定開會、投票，政府都唔使再為建制派議員到唔到、投唔投票擔驚受怕，不穩定因素減低，新陣容有冇新表現，十月就知分曉。

據聞建制派內部明白過去嘅問題，趁住立法會換屆，就將上屆表現差勁嘅功能界別議員踢走，取而代之嘅幾乎全都係有心有力之輩，包括已自動當選嘅金融界吳亮星、中總代表廖長江、勞工界「勞聯」潘兆平、工聯會郭偉強及鄧家彪，連同強勢參選嘅體育界馬逢國、旅遊界姚思榮等，期望改善功能界別形象外，亦可為建制派數票掃除不穩定因素，藉此為建制派重新磨合創造有利條件。

不過，走咗大懶蟲，有部分建制派人士又因新人多而心驚驚，直言難保新一屆立會有新嘅「神經刀」出現，再次令大家為數票食驚風散喎！究竟新一屆建制派組成是否換湯不換藥，會唔會仍然有各自為政、不顧全大局嘅情況，就要拭目以待喇。體育、演藝、文化及出版界候選人仲有蕭思江、周俊輝；旅遊界候選人仲有葉慶寧。