政壇：林鄭吹水發叔講金

新班子履新後，政務司司長林鄭月娥好快投入角色，尋日更聯同民政事務局局長曾德成、特首辦主任邱騰華，一齊同全港區議會主席舉行會議兼共進午餐，咁高規格拉攏地區人士，大家亦好畀面，連同林鄭喺新界村屋問題上多番交手嘅屯門區議會主席劉皇發都坐足全場。不過，林鄭嘅盛宴似乎並未令發叔「嘴軟」，佢當住林鄭嘅面要求區議會必須「既有權又有錢」，睇嚟即使抽離新界事務，兩個人都有大把問題交手。

林鄭尋日同地區人士打關係時，又引述特首梁振英嘅地區政策，話新政府會視各區區議會為政府施政嘅重要夥伴，又話地區問題會盡量喺地區解決。言下之意即係以後區議會將處理更多當區事務，功能亦會更強、更多。與會者都反映咗唔少意見，當中又以發叔嘅說法最直接，佢講到明，要強化區議會，要錢同要權就夠喇。一出招，就點中要穴。

老對手林鄭並冇即時有回應，話晒呢啲場合都係互相吹水、打招呼，講吓門面話已經夠，無需要政策辯論喎。不過林鄭都趁呢個場合送大禮，透露政府又有惠民新招，即係派錢新招，新嘢話咗畀區議會聽先，一班龍頭地區人士都覺有面喇。

問KK會否「滅黨」

講開林鄭，佢同唔少政界人士都保持良好關係，言談亦放好多。日前佢同前扶貧委員會成員會面時，有與會人士就爆料話林鄭一見到參加超級區議會選舉嘅馮檢基，就劈頭問KK係咪會「滅黨」，事關KK將九龍西席位交畀黨友出戰，但兩人嘅選情都唔樂觀，政圈已有滅黨之說，但好似林鄭咁高調當面問，真係唔多，難怪KK以笑遮醜唔出聲，其他人士就掩嘴竊笑。超級議席候選名單仲有劉江華、李慧琼、陳婉嫻、何俊仁、涂謹申及白韻琹。