積金防老半桶水 小修小補得把嘴

強積金有個花名叫「強輸金」，點解？事關喺千瘡百孔嘅制度之下，打工仔焗住做輸家，贏家只有班基金經理。好嘞，今年十一月起，強積金終於實施「半自由行」，打工仔有番些少自主權，咁係咪可以成為贏家呢？對唔住，答案係：未必！

何謂強積金半自由行？即係打工仔可以為自己嘅強積金供款自由選擇受託人同投資計劃，但僱主供款部分就唔可以郁，而且一年只准轉一次，所以稱為「半自由」嘞。積金局話喎，半自由行實施之後，二百幾萬打工仔可以做番強積金「話事人」，估計約有一成即廿幾萬人會選擇將累積供款轉移。

強積金係打工仔嘅血汗錢，投資賺蝕最緊要，有得揀梗係好過無得揀啦。之不過咁，如果你以為有咗強積金半自由行，打工仔退休就唔使憂，晚年就唔使愁，咁就實在太傻太天真咯。

試諗吓，強積金嘅投資項目五花八門，眼花繚亂，打工仔要讀懂咁多投資計劃，仲難過讀懂香港呢本書，實際會有幾多人轉移供款，真係好成疑問。嗱，就連積金局今次都唔敢吹牛皮，估計參與人數只得廿幾萬，即係話，對其餘打工仔來講，半自由行根本名不副實，得物無所用。

最大嘅問題係，就算打工仔半自由行，亦未必可以受惠。積金局成日提醒打工仔，投資回報高，風險一樣高，但係強積金嘅投資特色啱啱相反，回報率勁低，管理費超高，打工仔無論將強積金轉去邊，結果都係水瓜打狗，唔見一橛嘅啫。所以話，所謂半自由行，根本唔係真正嘅自由，打工仔照樣被迫做輸家，叮！

太一叮話齋，當局小修小補，整色整水，無非掩人耳目，敷衍打工仔啫。話時話，強積金制度推行咗十一年，千瘡百孔，問題多多，如果打工仔有得揀，寧願全自由，而唔係乜鬼半自由，即係話，當局係時候全盤檢討強積金制度喇。其實，強積金係打工仔嘅血汗錢，點解唔可以交畀金管局管理，而要畀基金經理過河濕腳，搞到打工仔畀人斬到一頸血？

咒人最毒嗰句係：「小心臨老唔過得世。」強積金淪為半桶水政策，唔湯唔水，不倫不類，好多打工仔真係臨老唔過得世，當局仲唔快快撥亂反正，因住收尾嗰幾年呀，叮！