政壇：政商定格：張宗豪幫葉楚航換新Look
喺上個馬季贏咗五十場、創出個人最佳成績嘅人氣練馬師Dennis葉楚航打理不少良駒，「詩閣」（Ascot Chang）董事總經理張德祥同家人名下嘅駿駒「定做」亦歸於葉廐，七月初馬季煞科前，就以獨贏一百倍嘅超冷姿態勝出。Dennis對此嘆為觀止，話從練十年從未見過，於是早前就約埋張德祥囝囝Lincoln張宗豪，冒住酷熱天氣，去馬房餵食紅蘿蔔以示獎賞。
由於馬會對男士衣着規定嚴苛，就算三十幾度高溫，都焗住打呔着西裝，認真有苦自知。當日Lincoln就靈機一動，自動請纓幫Dennis設計新形象，至緊要夠潮又清涼，又唔會被馬會詐型。且看下一個馬季開鑼，Dennis會否大變身？
「定做」喺馬季煞科前爆冷勝出，張宗豪（右）親自餵食紅蘿蔔犒賞；左為葉楚航。