政壇：搞搞政：建仔配錯票龍瑞卿彈出

建仔喺今次立法會選舉首度玩分區，新界西共派出三隊參選。每張名單負責搶唔同地區嘅選票，如果配票得宜，要令所有名單勝出並非冇可能。可惜選舉期開始後，該黨先至發覺支持者好唔習慣配票。

據講該黨內部調查同傳媒機構嘅民意調查都顯示，黨主席譚耀宗支持度有百分之十七以上，足夠帶埋排第二嘅屯門區議員龍瑞卿勝出，但係由新界社團聯會會長梁志祥同新界青年聯會主席陳恒鑌領軍嘅名單，就仍然只有個位數支持度，點計都唔夠贏。

有地區消息話，建仔喺屯門區有唔少具實力嘅區議員，起初諗住排譚Sir後面唔會贏到，紛紛拒絕披甲，如果龍瑞卿真係冷手執到個熱煎堆嘅話，佢梗係開心到好似中獎咁喇，但相信當初唔肯排隊嘅區議員肯定好後悔，唔知包唔包括佢老公陳雲生呢？

新界西參選名單仲有郭家麒、麥美娟、麥業成、田北辰、梁耀忠、李永達、陳樹英、陳強、陳偉業、李卓人、曾健成、何君堯同陳一華。