政壇：CY林鄭公子齊做建橋義工
為內地偏遠貧困地區建橋嘅「無止橋」慈善基金，嚟緊十一月舉辦步行籌款等活動，作為慈善基金義務秘書嘅新世界發展執行董事Leonie紀文鳳尋日宣傳活動時，透露政務司司長林鄭月娥嘅仔林節思同特首CY梁振英大仔梁傳昕，都先後做過義工幫手建橋，仲大爆林節思曾喺建橋嘅慶功宴上，大跳已故國際巨星Michael Jackson嘅勁舞助興，睇到在場嘅林鄭都忘形O嘴添！佢仲話佢哋做善事都好低調，全程冇表露過自己嘅身份。
除專注「無止橋」工作外，原來Leonie仲有項新大計。話說本周一喺中環置地廣場見佢同CY夫人梁唐青儀一齊搭𨋢上餐廳high tea，尋日問番佢哋傾乜密偈，佢笑笑口話係關於廚餘回收嘅大計喎，事關CY好關心環保議題，想做好呢樣嘢。咁啱得咁蹺，大約一個鐘後又見新世界發展執行董事鄭志剛搭𨋢上樓，莫非係同廚餘計劃有關？
梁唐青儀（右）同紀文鳳（左）去歎下午茶傾廚餘回收大計。