侵權斷正跪低 《爽報》死性不改

「手莫伸，伸手必被捉」呢句忠告，簡直係為文抄公度身訂造。呢，有辦睇o架，壹淫媒侵犯東方報業集團知識產權死性不改，卒之又衰一鑊！

件事係咁嘅，今年三月十三日，壹淫媒旗下免費《爽報》晚版擅自使用本報同《東方日報》當日港聞版刊登嘅新聞相。東方發現侵權行為後，採取法律行動追究，《爽報》最終跪低求和，向法庭繳存二萬零一蚊「附帶條款付款」及支付三萬五千元律師費。

江山易改，本性難移。查實，壹淫媒侵犯東方版權已經唔係第一次o架喇。早喺一九九五年，《壹本便利》擅自使用東方有關扑頭黨嘅報道同相片，自此之後，呢班文抄公食過翻尋味，侵權侵上癮，過去十七年壹淫媒已經四十八次侵犯東方版權喇。

壹淫媒咁多年來淨係就侵權行為向東方賠償或繳款法庭，累計金額已經超過一百三十萬元。屢侵屢賠，屢賠屢侵，嗱嗱嗱，一個屈尾十又賠多一劑，呢啲咪叫多行不義必自斃囉，叮！

不問自取是為偷也。城市大學學者宋立功講得啱，每家媒體都利用自己嘅資源同努力報道新聞，冇理由將人哋辛勞所得據為己有。如果有人為吸引讀者注意力而擅用東方嘅相片，對版權擁有人唔公平。反色情資訊組織嘅負責人更直指，《爽報》未經允許擅用他人獨家相片嘅做法有違道德。

叮！如果壹淫媒知道道德為何物，就唔會整份誨淫誨盜嘅報紙出嚟獻世啦。一直以來，佢哋恃住有港英餘孽同無良政客包庇縱容，肆意販賣不良資訊。《爽報》內容鹹濕賤格係人都知，有調查發現，超過六成受訪者認為該報對青少年道德觀念最有負面影響。咁嘅報紙居然免費通街派，所以話，同淫賤黎呢個禮義廉之輩講道德，正一係問和尚借梳，講都多餘。

《爽報》創刊短短幾個月已經接到數百宗涉及淫褻同暴力嘅投訴，被淫審處評定為不雅嘅送審物品更多達廿幾件。宣淫販賤已經超可惡，為咗吸引眼球，竟然不擇手段，用埋啲鼠竊狗偷嘅邋遢招，文章抄得就抄，相片偷得就偷，簡直係傳媒敗類。

正所謂，淫賤不能移。壹淫媒狂灑鹽花嫌唔夠，仲大肆抄襲剽竊，今次侵權斷正，付錢收場，直情係益咗佢哋喇，叮！