政壇：政商定格：黃志祥家族星酒店信託上市
信和置業主席黃志祥喺香港地產市場好活躍，原來佢家族喺新加坡嗰邊都有動作。黃氏嘅家族旗艦遠東機構，最近就將旗下七大酒店同四個服務式住宅，組成Far East Hospitality Trust，以信託形式分拆喺新加坡上市。呢單係新加坡今年最大嘅新股集資，不但為當地金融市場增添生氣，黃志祥家族身家料亦水漲船高！
遠東機構係新加坡最大私人物業發展商，聽聞呢個分拆活動，市場反應好好，並以上限定價，集資5.26億美元（約41億港元）。不過，即使唔計今次分拆，黃志祥同其弟黃志達今年都蟬聯福布斯新加坡首富，估計身家合共高達92億美元（約717億港元）。
根據佢哋家族嘅分工，黃志祥專注香港，黃志達就睇實新加坡，所以今次分拆，黃志達應該孭重飛。
黃志祥家族喺新加坡集資後，身家料會水漲船高。（資料圖片）