政壇：政商定格：蘇家碧過冷河工總等坐正

香港工業總會總經理、前商務及經濟發展局副秘書長Linda蘇家碧，返新工未夠兩個月，尋日首次現身公開活動，為職業訓練局塑膠材料資源中心開幕禮做主禮嘉賓。

Linda笑稱，再就業「冷河期」到年底就結束，到時未必即刻坐正做工總行政總裁（CEO），事關有工總主席鍾志平同副主席Stanley劉展灝輪流幫佢頂更做對外工作，如果想做多陣「署理CEO」嘅話，就畀佢哋過足癮喎！

Stanley話幫Linda做對外工作一啲都唔困身，好似啱啱就同一班鐘錶界老友親臨英倫欣賞精彩賽事，仲睇埋閉幕禮至返港。

講番塑膠材料資源中心成立，負責統籌嘅係香港塑膠業協會主席黃可嘉，佢係中華廠商聯合會前會長黃友嘉嘅哥哥。一眾工業界名人力撐塑膠並非魔鬼，話塑膠普遍應用於玩具、家電同鐘錶等行業，對工業影響好大。