政壇：莊家彬詩巴丹深潛考牌
莊士集團太子爺Albert莊家彬十四、五歲已考獲潛水牌，其後去美國讀書，興趣暫時擱置，直至今年初再重拾嗜好，一玩就「發晒燒」，短短一年間潛遍布吉、菲律賓小島同沖繩。早前佢就約埋人稱「靚仔醫生」嘅莫樹錦，一齊去著名潛水勝地馬來西亞詩巴丹（Sipadan）進修潛水技巧，極速考獲高氧潛水牌，進軍深度潛水。
詩巴丹水質清澈，海龜、鯊魚隨處可見，更可探索沉船遺骸。Albert夠膽大，一度潛到水深約三十七米，感覺好刺激，但若要數最過癮嘅，仲係喺水底做實驗。話說早前佢喺網上見有人帶生雞蛋下潛十幾米，然後打爛蛋殼，剝走蛋白，此時蛋黃因為壓力緣故，喺水中載浮載沉，十足乒乓波咁。佢一於照辦煮碗，果然好玩又過癮。
莊家彬（左）喺詩巴丹考獲高氧潛水牌，獲教練Stephen（右）頒發證書。（受訪者提供）
莊家彬探索沉船遺骸時發現一個舊汽水樽，即時百厭執起佢扮水底酒鬼。（受訪者提供）