政壇：張國柱冧番職業治療師
日前李鄭屋邨發生精神病母掟女嬰落街悲劇後，有報道引述社福界立法會議員張國柱「一直質疑」職業治療師同物理治療師係咪有足夠嘅訓練，點解可以跟進呢單悲劇，結果惹嚟職業治療師不滿。經過該業界連日喺facebook留言洗板同要求，尋日阿柱就約埋呢班職業治療師三口六面講清楚。
香港職業治療學會日前曾發聲明強調，精神康復係職業治療師受訓嘅必修科目，好多職業治療師亦喺精神康復團隊擔任重要角色，所以質疑阿柱嘅言論有誤導之嫌，亦有欠尊重佢哋嘅專業。阿柱解釋，佢又點敢質疑職業治療師嘅專業吖，當日佢只係想話唔掌握有關專業訓練，講到好似一場誤會咁。社福界候選人仲有陳義飛。