政壇：阿Paul寸學民思潮無禮
學民思潮連續第三日去各政黨示威，逼一眾立法會選舉候選人表態係咪支持撤回國民教育，尋日就輪到九龍東候選人阿Paul謝偉俊。學民思潮十幾個成員去阿Paul喺銅鑼灣嘅律師樓踩場，召集人黃之鋒喺搵唔到阿Paul後狠鬧佢立場含糊不清，又話覺得有部分政黨高層親身接見學生誠意爆燈，反之阿Paul影都唔見就罪大惡極。
阿Paul回應話之前清楚講明政府要撤回國民教育，又話政府可以用公民教育取代國民教育。佢批評學民思潮做嘢冇啲分寸，寸佢哋唔打電話同佢講聲就踩上寫字樓係冇禮貌，又鬧佢哋嘅滋擾行為阻住律師樓職員做嘢。
九龍東其他候選名單包括黃洋達、胡志偉、黃國健、陳鑑林、梁家傑、譚香文同嚴鳳至。
學民思潮示威搵唔到阿Paul，於是鬧爆佢唔肯表態反對國民教育。