政壇：阿王樹根搶福建票

早前都講過立法會選舉香港島選情好緊湊，因為建制派本來希望可以攞到四席，但睇番依家嘅局勢，要保得三席都有困難，所以外界盛傳建仔嘅鍾樹根、工聯會嘅「阿王」王國興同富貴黨嘅劉健儀三個只能活一個，當中樹根同阿王嘅競爭就更激烈，事關本來係「兄弟班」嘅工聯會，今屆唔肯再為建仔抬轎，唔單止唔會過票畀建仔，仲要搶番建仔啲票添！

踩入北角 票后助選

由新界西重返香港島出選嘅阿王，尋日直接踩入北角向班福建幫街坊拉票。雖然工聯會上屆冇派人喺香港島參選，但阿王做過東區區議員同前市政局議員，相信唔少街坊唔會忘記佢以前掛喺北角新光戲院嗰幅「成功爭取」報告嘅大型橫額，所以班北角街坊聽到佢返老巢都勁開心。阿王公開呼籲，叫上屆投票畀建仔嘅工聯會支持者要盡快歸隊，睇嚟為咗選舉，連自己人都冇偈傾。

建仔喺○八年香港島直選，爭少少票至搶到兩席，令福建幫阿姐「蔡菜子」蔡素玉飲恨，今屆該黨換上知名度較低嘅樹根，面對高知名度嘅阿王搶票，呢場仗真係好難打。

尋日阿王仲請埋「票后」陳婉嫻去北角街市拉票，仲同班街坊講自己告急，呼籲一定要支持工聯會。如果樹根依家仲係咁老定，諗住靠東區票源就贏到議席，咁就要認真諗清楚前路喇。

香港島參選名單仲有單仲偕、葉劉淑儀、勞永樂、劉嘉鴻、吳榮春、陳家洛、吳文遠、何秀蘭同何家泰。超級區議會議席參選名單仲有劉江華、李慧琼、何俊仁、涂謹申、馮檢基同白韻琹。