扶貧重新起步 切忌虎頭蛇尾

香港貧富懸殊，堅尼系數冠絕全球發達經濟體，早就臭名遠播。港府曾於○五年設立扶貧委員會，可惜雷聲大雨點小，搞到愈扶愈貧，短短兩年就摺埋。嚟到今屆政府，扶貧再次成為熱門話題，特首梁振英一早承諾重設扶貧委員會，籌備小組近日仲開始接見各界人士，聽取意見添，不過咁，究竟點樣扶貧，效果係點，仲要睇過至知。

香港貧富懸殊有幾嚴重？嗱，舊年堅尼系數已升到零點五三七，遠遠高過零點四嘅警戒線，創出四十年新高，問你怕未。樂施會認為，上屆政府扶貧不力，前扶貧委員會有四大不足之處，係導致扶貧成效不彰，加劇貧富懸殊嘅主要原因。邊四大不足呢？包括冇訂立貧窮線及減貧目標、扶貧措施零散、缺乏諮詢機制同埋統籌不力。

冇錯嘞，前扶貧委員會形同虛設，名不副實，擺明係當局用嚟敷衍民意，點可能有成效吖。唔使講其他嘢，扶貧委員會成立兩年幾一事無成，連訂立貧窮線咁簡單嘅嘢都冇做到，你話係咪搞笑吖。試諗吓，又冇貧窮線，又冇目標，究竟點樣扶貧呢？

講到底，港府一直唔肯訂立貧窮線及減貧目標，根本就係扮鴕鳥，佢哋可能以為冇貧窮線就冇貧窮問題啩，所以一味以派糖呢啲小恩小惠敷衍了事。呢，煲呔曾講過，貧富懸殊係資本主義嘅產物喎，簡直九唔搭八。冇錯，全世界都有貧富懸殊，唔係香港獨有，弊在香港嘅情況特別嚴重，咁又點樣解釋吖，叮！

講起前扶貧委員會就巴閉咯，摺埋之前曾提出五十三項建議，洋洋大觀，點知全部零零碎碎，卒之只有幾項建議勉強得到落實，其餘全部無影無蹤。好似生活補貼咁吖，最後竟然變咗交通津貼，申請單位又由個人變成家庭，同原意相差十萬八千里。

古人話齋，不患寡而患不均。香港深層次矛盾千頭萬緒，市民怨氣愈嚟愈大，講嚟講去主要就係因為貧富懸殊。回歸十五年來，經濟蛋糕的而且確愈做愈大，可惜有權分享蛋糕嘅只係少數人，大部分港人蜑家雞見水冇得飲，導致富者愈富，貧者愈貧，有乜法子唔引起民怨吖。

梁振英政府肯正視呢個問題，重設扶貧委員會，總算係撥亂反正嘅第一步，但太一叮不能不提醒一句，扶貧最緊要制訂長遠政策，持之以恒，千祈唔好學前朝政府虎頭蛇尾，半途而廢吖，叮！