政壇：政商定格：銀行請CEO要金管局面試？
為加強企業管治，金管局就根據《銀行業條例》改監管手冊，日後銀行委任CEO時，呢位CEO可能要去金管局面試完先會獲批。金管局助理總裁（銀行操守）戴敏娜尋日就發咗封通函畀銀行，交代吓啲轉變。記者睇到最重要嗰部分，就係金管局如覺得有需要，會同銀行委任嘅董事局成員同埋CEO會面，睇下佢係咪適合新職位，甚至可能要見埋現任嘅董事同埋高級管理層。
金管局發言人就話，要唔要見面係視乎銀行規模、重要性、人選背景等，如果一直有合作開，知道對方熟悉銀行同金融，唔係一定要見完面先批，即係話熟落嘅就免面試，本地薑同內部晉升嘅賓架（Banker）應該唔使去IFC金管局總部，過江龍就麻煩少少。之不過，如果對銀行穩定有幫助嘅，大家行多步囉！
戴敏娜發信畀銀行，交代新轉變。（資料圖片）