政壇：搞搞政：建仔擬設副主席安慰立會落選人

呢排陸續出台嘅民意調查，成為各大陣營調整立會選舉策略嘅指標，但建仔兩名力捧嘅候選人，即係出戰新東嘅葛珮帆同新西嘅陳恆鑌嘅支持度至今仍未有太大起色，據聞有人疑似已向前走一步，諗定安置兩名明日之星嘅方案。

有消息指建仔早前曾討論係咪增加副主席職位，預料喺換屆後將有兩個副主席空缺。有心水清嘅黨內人話，呢兩個空缺正好考慮用作安置冇功都有勞嘅立會選舉落選人，咁咪即係畀安慰獎囉！

另有黨內人則持不同意見，指呢啲安置方案嘅前提係葛陳落敗，倘佢哋一齊成功進入立會，根本唔存在安置嘅問題，加上佢哋喺黨中常委資歷較深，就算「升呢」做副主席亦都合情合理喎！下一站何去何從？就要睇佢哋能否殺入立會喇！

已報名參選新界西嘅有譚耀宗、梁志祥、郭家麒、麥美娟、麥業成、田北辰、梁耀忠、李永達、陳樹英、陳強、陳偉業、李卓人、曾健成、何君堯、陳一華。已報名參選新界東嘅有張超雄、田北俊、葉偉明、陳志全、劉慧卿、黃成智、蔡耀昌、范國威、湯家驊、陳克勤、梁國雄、龐愛蘭、邱榮光、何民傑、梁安琪、方國珊、陳國強同龐一鳴。