政壇：人力小冊子揭白鴿臭史

白鴿黨過去恃住係泛民主派龍頭，一直食老本不思進取，自稱「日日做漢奸」嘅創黨主席李柱銘，更連同一班民主惡勢力搞搞震，總之一班老鴿以「賣港」為己任，搞到眾叛親離，支持度下跌。新興政團人民力量成立以嚟不斷撕破白鴿黨嘅假面具，最近趁立法會選舉印製二十萬本《偽民主派賣港實錄》小冊子，希望選民睇清楚偽民主派嘅真面目。

立會選情凶多吉少

《偽民主派賣港實錄》近日開始派落區，封面同內容都係衝住白鴿黨而來，除繼續鬧白鴿黨支持前年政改方案外，仲將佢哋歷年嚟做過嘅衰嘢分類列出，每件事都寫到清清楚楚，令白鴿黨呢班賣港賊不容抵賴。

先講已落荒而逃嘅「貪曾」，今年初被東方報業集團獨家踢爆佢貪盡海陸空，人民力量二月底已經話要彈劾佢，誰知一向宣稱會監督政府嘅白鴿黨同公文袋立法會議員唔知搞乜，竟然拖足兩個月先扮嘢做大龍鳳話會支持彈劾，結果時機盡失，草草收場，白白放生貪曾。

小冊子又詳列白鴿黨出賣民主、出賣民生嘅醜行，足以證明該黨惡行罄竹難書。

今次批判白鴿黨，人民力量代價都唔細，小冊子要計算選舉經費，初版印咗二十萬本，直接令本身宣傳少咗。白鴿黨已去到窮途末路，黨主席鐵頭仁近日不斷被揭發涉嫌漏報公司股份資料同利益，但佢仍堅持文過飾非，拒絕認錯，相信該黨嚟緊選舉都係凶多吉少，選民必定要該黨票債票償。參選超級區議會議席嘅名單仲有涂謹申、馮檢基、陳婉嫻、劉江華、李慧琼同白韻琹。