政壇：搞搞政：紅白藍選票玩殘政黨

講起紅白藍，唔少人就會聯想到膠袋，不過下月九號舉行嘅立法會選舉，紅白藍就堂而皇之出現喺票箱同選票上。事關今屆立法會選舉新增有「超級議席」之稱嘅區議會（第二）功能界別，連同傳統嘅地方直選及功能界別，相當複雜，為免選民投錯票、入錯票箱，選舉事務處特登用紅、白、藍三種顏色區分三種選票，仲話票箱係紅色代表功能界別，白色代表超級議席，而藍色就代表地方直選，政府亦大唱「紅、白、藍」做宣傳。

有候選人最近就睇過官方嘅模擬選票，發現所謂嘅紅、白、藍三色只係各自印喺選票嘅背面，選票正面劃一係白底黑字。可惜政黨似乎對呢啲安排矇查查，建仔一直以為藍色選票係成張藍色、白色選票就成張白色，冇諗過只係喺選票背面用唔同顏色區分，質疑背面分顏色點區分到呢？據講民協亦被政府誤導，佢哋喺宣傳單張上已經印咗全張白色同全張藍色嘅模擬選票式樣，結果得不到預期宣傳效果之餘，仲要花一輪唇舌解釋。不過，有政黨就大嘆好彩，因為冇諗過咁快印製模擬選票去教選民投票，否則分分鐘要丟棄。