大學迎新鬥鹹濕 低級趣味玩不厭

大學生活由淫開始,未曾讀書先鬥鹹濕,成為香港校園一景,如果孔夫子翻生,睇怕又要嘆句「吾不欲觀之矣」。

大專院校迎新營玩淫賤遊戲,幾乎已成指定動作,年年如是,而且愈淫愈開心,愈賤愈快樂。日前有網民爆料,科技大學工商學院今年迎新營大玩有味遊戲「毛毛蟲」,男女梅花間竹,後面嘅人雙腳緊蹺前面同學,組成人形蜈蚣,鬥快到終點,結果迎新變撩陰,簡直不堪入目。

雖然家陣已經唔係男女授受不親嘅年代啫,但男女學生交纏玩樂,唔止肌膚接觸,仲不時互相碰到敏感部位,學生不以為恥,反以為樂,問你服未。有關注團體批評迎新遊戲「明顯意識不良」,一啲都冇講錯。

迎新遊戲沒有最淫,只有更淫。呢,男生企高雙腿夾樽射水、女生跪地接水狀似口交,夠不文喇啩?仲有吖,模仿接吻嘅口傳奇異果、男生易服着三點式泳衣選「系草」、男上女下騎牛牛等等,無奇不有,唔賤唔玩。

唉,今時今日道德淪喪,斯文掃地,大學校園烏煙瘴氣,天之驕子淪為淫賤書生,真係該煨咯。見到咁嘅場面,為人父母會點諗呢?社會人士又會點諗呢?

大學迎新營玩來玩去都係呢種低級趣味嘅遊戲,唔通學生除咗淫賤不文之外冇嘢好玩?唔通咁就代表香港社會開放?唔通呢啲就係下一代嘅「創意」?

唔講唔知,原來現時各院校並冇規例禁止迎新營玩不文遊戲,活動形式淫與不淫,只能靠學生自律。正如《三字經》話齋,「教不嚴,師之惰」,雖然學生活動不宜過分干預,但校方至少可以提供適當指引啩,如果放任自流,連道德底線都放棄,何止不負責任,直頭係誤人子弟。「大學之道,在明明德,在親民,在止於至善」吖,知冇?

講開又講,近排「洗腦」疑雲搞到滿城風雨,德育及國民教育無喇喇變咗洪水猛獸,生人勿近。其實,大學迎新營年年玩淫賤,學生品味低俗,校園烏煙瘴氣,正正係德育缺失嘅惡果。你話喇,香港究竟有冇必要推行德育及國民教育吖!

梁啟超話齋,「少年智則國智,少年強則國強,少年進步則國進步」。大學生不知道德情操為何物,淨係識玩淫賤,鬥鹹濕,日後點樣智、點樣強、點樣進步吖,叮!

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報