政壇：陳嘉琪教育副局擦身過
早前政府安排副局長人選面試，現任教育局副秘書長陳嘉琪都有到場，大家以為佢一定做硬教育局副局長，但據講喺最後關頭出現變卦，佢已經唔喺名單上面。
依家教育局變咗熱廚房，日日畀班學生、家長狂插，副局長呢個位唔係人人啃得落，唔知係陳嘉琪未夠班，定係佢想留守原職，主力為新學制課程檢討工作，總之依家佢唔會再競逐副局長個位。事到如今，教育局要花時間再物色人選，睇怕局長吳克儉喺國民教育科風波上，要獨力迎戰班學生同家長。
本身係人力資源專家出身嘅吳克儉，對於請人有一套理念，寧願慢慢請都唔想求其搵個人頂上。佢話副局長唔一定要公務員出身，但最好有一定教育經驗、有理想、有遠景，仲要同教育局上下、學界夾得嚟先得，咁有要求隨時到年尾都未有着落，但佢話唔緊要，要請啱人嘅話，少啲耐性都唔得。
有傳聞話陳嘉琪已經唔喺教育局副局長名單上。（資料圖片）