政壇：劉國裕黃遠輝回家

兩名房屋委員會前委員入咗官場熱廚房，雖然唔知佢哋適應咗新崗位未，但政府尋日委任學者劉國裕、銀行家黃遠輝做房屋委員會委員，任期兩年，填補運輸及房屋局局長張炳良、審計署署長孫德基，呢兩位房委會前委員嘅空缺。其實佢哋都曾經做過房委會委員，今次係「翻閹」，唔通政府搵人做公職真係咁難，要搵舊人出山？

現時，房委會委員蔡涯棉、葉國謙都喺多年前做過房委會委員，做夠六年要起身，離開後又再獲委任，搞到房委會嚟嚟去去都係嗰班人。

曾與張炳城大共事

劉國裕係城市大學公共及社會行政學系副教授，早喺九六年加入房委會，○二年做夠六年就離任。世事難料，可能連佢自己都估唔到，十年後可以重返房委會。劉國裕不時就房屋問題發表意見，教書前做社工，走遍公屋、木屋、臨屋，接觸低下階層居民，佢有得「翻閹」，除咗因為對房屋問題瞭如指掌外，亦可能因為張炳當年做城大公共及社會行政學系系主任時，同佢做過同事有關。

至於工銀亞洲前董事黃遠輝○五年做房委會委員，舊年先離任，期間做過房委會財務小組委員會主席，離任一年就「翻閹」，速度相當之快。喺銀行界打滾近四十年嘅佢講過，細個時住木屋，後來入住徙置區、廉租屋，可謂房屋政策嘅受惠者，所以加入房委會，希望盡綿力回饋社會。聽聞佢仲好大機會做埋房委會資助房屋小組委員會主席添，負責居屋同公屋政策，責任重大。

講到快嘅話，咁張炳肯定係極速，呢頭辭咗房委會，嗰頭就做運房局長，跟手又以房委會主席嘅身份坐番入去，只不過係角色唔同咗啫！