SUN微博：打橫嚟講：未選舉，先低B反智

今屆立法會選舉提名，前日結束，因地區直選及超級區議會議席共添十席，令有意從政的心急人滿腦遐想，唔顧自己乜叉身屍蘿蔔皮，有乜「哥利」，都去報名博大霧，趁亂撈番一個光宗耀祖嘅「候選」議員名銜，印落卡片上，方便菲傭辦理延期手續。

今次參選者之多，是歷屆之冠，真係交竹咁亂，有啲一張名單內有九條友，都唔知話佢哋白癡？定係玩嘢？在比例代表制下，排第三的，要入局的機會幾乎等於零啦！仲成棚傻仔咁戙出嚟，博上鏡多過想為社會服務做議員囉！

香港選舉活動指引，十分官僚式反智，規定傳媒報道時，要遵守一項名為「平等時間」的弱能舉措，就係每次報道時，只要提過某區任何一個參選人的名字（或黨名），便要「公平地」噏埋同區其他所有參選者的名字；電子傳媒就更慘情，要讓每隊有同樣長短曝光時間，好啦！若直播一小時，扣除廣告預告等，可能只得嗰四十多分鐘，依家新界東出戰的，就有二十組人，每組平均兩分鐘，淨係講「政綱」都唔夠時間啦！仲邊鬼度有互片駁嘴吵鑊時段呀？

嗱！這低B的規定，不特只麻Q煩新聞記者，連寫專欄的同樣要跟此指引行事，若一個唔好彩，文中提及一條參選人，便要水蛇春咁長抄埋其他粉腸個名落去，大佬！隨時一個區十幾張名單，百幾人，每個人名三隻字，淨人名已近四百字，小專欄四、五百字，仲使講嘢？

世界點會有咁戇Q嘅選舉指引o架！只有香港獨有！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

就係敢爆：奧運靚仔靚女逐個數

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot