政壇：庫克識貨like福建太姥山

蘋果公司行政總裁庫克（Tim Cook）最近又有新搞作，仲吸引到好多網民關注，但佢今次唔係公布任何有關新iPhone 5或Mini iPad嘅消息，而係佢喺社交網站The Fancy開咗個account，同啲蘋果迷分享一啲佢fancy嘅嘢。

可能有好多人會懷疑呢個account係假嘅，照計庫克日理萬機，應該冇乜空閒時間玩呢啲社交網站，但係The Fancy同Twitter一樣，需要名人驗證，而呢個account就已畀The Fancy驗證咗係庫克本人嘞！

究竟庫克會fancy啲乜嘢呢？身為蘋果公司CEO就梗係會like番Apple Store啦！除咗咁，佢仲好鍾意戶外活動，fancy咗Nike、Carvelo單車同Blaken手錶等，睇睇吓仲見到位於中國福建嘅太姥山， 嗰度融合山、海、川同人文景觀為一體，有「山海大觀」嘅美譽，被國務院列入第二批國家級風景名勝區，難怪庫克都會為之神往，要like吓佢啦！