政壇：搞搞政：黎棟國自爆副局日內出爐
仲記得早前保安局局長黎棟國以「百家姓」嚟應付被問及副局人選，非常口密。尋日有報道話警務處副處長李家超將提早退休，接任副局一職，黎棟國出席撲滅罪行委員會會議後，就被追問幾時至公布副局人選同埋揀選副局有乜準則。佢開頭都好淡定咁話要將個問題答得「闊一啲」，又話做到決定嘅時候，就會適時向大家公布。
佢以為拉埋老細落水就一定過骨啦，點知記者再追問所謂「適時」即係幾時？佢就叫大家毋須執着於一兩日嘅時間喎。今次竟然忍唔住自爆添！
其實班局長似乎都有「自爆的藝術」，最經典係環境局局長黃錦星上任前，被追問係咪會做局長時，忽然預言「我星期四會回應」，結果新政府真係如期公布任命。至於黎棟國今次嘅預言有幾準，相信好快就知喇！
設計圖片