政壇：梁班子分享人生「秘密」

特首CY梁振英新班子上任剛滿月，一本叫《齊心一意為市民》嘅小冊子尋日喺特首辦網頁曝光，用軟性角度介紹新班子。

小冊子由CY以「齊心」為題寫序，三司十二局連同五名要中央任命嘅官員粉墨登場接受訪問，大談自己嘅「小故事」同「小秘密」。打頭炮係「好打得」嘅政務司司長林鄭月娥，佢大爆當年任職保安科時，有入境事務助理員喺持槍打劫案協助捉賊中槍身亡，呢份文件送到林鄭手中時，佢不禁落淚，並批准當時保安科建議由庫房撥出特惠金表揚呢位員工。

新班子嘅一眾局長亦有血有肉，原來環境局局長黃錦星已近十年冇打呔返工，早年佢喺建築事務所工作，連老闆同事都被佢感染，衣着輕便又可校細啲冷氣，當時已有同事戲稱佢做「環境局局長」。本身係人力資源專家嘅吳克儉，喺小冊子自行拆解「一加一」呢條數學題嘅大智慧，即兩個人馬虎做事，一加一最多得到二，唔合作嘅話只得一點一或更少，倘有目標共同奮發，一加一會係十一或有更多回報。