政壇：郭榮鏗亂插王桂壎

立法會提名期前日結束，法律界兩名參選人泛民大律師Dennis郭榮鏗同律師會前會長王桂壎，尋日就喺電台同場辯論。

雖然法律界向來係泛民票倉，但今屆改由資歷較淺嘅Dennis參選，對戰資歷較深、立場開明、並且一向同泛民有傾有講嘅阿壎，有一定機會「變天」，因此Dennis嘅競選策略，自然係將阿壎「定型」為左頭左腦嘅保皇建制派。

偏偏阿壎對平反六四、取消功能界別、人大釋法，以至國民教育嘅立場，都同泛民全無分別，令Dennis無位可入。之不過，阿壎突然自爆早兩個月前曾經同中聯辦（西環）部長級人員食飯，對方有問佢係咪有意參選立法會，認為對方只係想了解本港政治發展，唔涉及干預本港內部事務。可能佢都意識到會畀對手插，於是補多句，承認中聯辦官員搵一啲有意參選嘅人士聚會，表現太關心。

泛民首腦咪要打靶？

等咗咁耐，終於搵到位，於是借呢餐唔涉及任何干預、勸進或枱底交易嘅飯局大做文章。Dennis立即插阿壎咁做好唔啱，因為兩個月前已進入選舉期，事件顯示中聯辦積極參與本港事務，令人質疑企圖干預選舉，總之講到阿壎好似犯咗乜嘢彌天大罪咁！佢跟住仲強調自己唔認識任何中聯辦官員。

其實阿壎都講到明餐飯唔涉及任何干預、勸進或枱底交易，如果咁都有問題，泛民不如入稟申請永久禁制中聯辦人員步出西環總部食飯飲茶啦！再講，當年多名泛民首腦直入中聯辦參與政改談判，咁係咪應該要全部拉晒去打靶？