政壇：搞搞政：打壓自己人唔手軟

日前都講過白鴿黨同公文袋被傳出大搞密室政治外，更打壓自己黨員，即係一直想選超級區議會議席嘅公文袋南區區議員司馬文。佢喺上周三中委會上要挾退黨，點知尋日就宣布唔參加地區直選，聲言唔想分薄泛民港島區嘅票源，而目前佢只得十個提名，相信無乜機會選超級議席。

雖然唔參加直選，但佢淨係呼籲選民支持泛民而非公文袋，再加上佢尋日正式向公文袋遞信退黨，睇嚟雙方關係真係冇得掹。講到底，司馬文都算係有情有義，只可惜佢入錯一個無情無義嘅政黨。

講到身兼香港家庭教育學院主席嘅白鴿黨成員狄志遠，因幾日前話國民教育科唔係洗腦科，隨即被該黨主席「鐵頭仁」何俊仁譴責佢嘅講法違背咗民意同黨內嘅立場，又嚴厲話以佢嘅政治歷練，居然無視社會人士嘅強烈反對同憂慮，除咗要求佢反思及收回言論外，仲話收到黨員投訴，並按程序跟進。

聽聞狄志遠都頗有微言，話黨員同黨意見不一嘅事件時有發生，只要黨員喺發表言論時表明意見唔代表黨嘅立場就冇問題，唔明白鐵頭仁點解要攞佢嚟開刀喎！