政壇：KK戰超級議席隨時「滅黨」

民協上星期變陣後尋日再去報名參選，原本循新西出選嘅廖成利就會返民協揼石仔基地九龍西，為譚國僑抬轎，而KK馮檢基就會維持挑戰被喻為超級議席嘅區議會（第二）功能界別。

KK尋日話變陣後嘅民協選情仍然嚴峻，但「勇敢」嘅民協唔想「安安全全」咁生存，為咗可以「有意義生存」同埋團結泛民，所以會繼續冒「滅黨」嘅風險，出選超級議席。至於係邊個咁大膽「滅」咗民協？KK就冇講。

正所謂不認不認還需認，KK尋日承認，超級議席係一個非常危險嘅遊戲，事關呢個全港性選舉鬥嘅係知名度、錢同樁腳，風險唔少，仲話今次佢哋係冒滅黨風險出選。

唔認同李慧琼爭

講到黨之將亡咁，唔通民協會連九龍西呢個基地都保唔住？但KK一聽到就話，對佢嘅選民十分有信心，重申民協有責任出選超級議席咁話。

對於外界指超級議席最後一席乃KK同建仔李慧琼之爭，KK就斷言呢啲只係流言，又話「公道自在人心」。至於如果佢選唔到會唔會退出政黨？KK就話，佢睇唔到市民要放棄民主派喎！

已報名參選九龍西嘅名單有梁美芬、黃碧雲、毛孟靜、蔣麗芸、黃毓民、黃逸旭同黃以謙；而已報名參選區議會（第二）仲有劉江華、李慧琼、何俊仁、涂謹申、陳婉嫻、白韻琹名單。